18/11/2008
文： 蘇豪
英格蘭U21成功進軍歐國盃決賽周後，今晚熱身約戰捷克U21，兩軍會於錫菲聯主場巴摩徑球場交手，今次「幼獅兵團」陣營人面全非，多位英超球會主力冇入選，防線天殘地缺，搞到頭重腳輕，無必勝把握，不如改捧較好分頭大盤！（now 671周三凌晨３時45分直播）
頭重腳輕擺明試陣
英格蘭小國腳於U21歐國盃外圍賽表現突出，決賽周明年會於瑞典舉行，今次皮雅斯安排呢場賽事，目的明顯為試新人，所以有多員主力缺陣，包括史提芬泰萊、韋達、侯度史東、占士米拿及麥克盧保等英超球員，加上文切尼、米卡李察士及艾邦拉荷等人入選大國腳，基本上完全換晒班，絕對不能同之前隊相提並論。
今場英軍人腳唔齊，預計會搵史迪雅文同馬田卡尼扼守中路，前者一頂帽都冇，後者亦只代表過八次，兩人默契同經驗都有限，而曼城門神赫特又已進身大國腳，今仗要搵小將湯希頓把關，想唔失波都難。相比之下，球隊前線人腳較佳，擁有熱刺三星費沙甘保、艾朗連儂及奧哈拉，仲有布力般箭頭達比舒利，加上列斯聯矚目新星戴菲，火力有晒保證。
捷克換帥激勵士氣
捷克U21未能打入歐國盃決賽周，早前已經落實換帥，新頭杜華利今場首度領軍，呢位主帥現年三十四歲，曾執U17及U19國家隊，今次點兵主要搵番國內搵食球員。為爭取新帥歡心，一眾小將實搏命爭取表現，撞對手陣容不整，絕對屬偷雞最佳良機，就算贏唔到都有望入到波。
兩軍去年曾於歐國盃U21決賽周交手，當時雙方互交白卷，不過今場性質完全唔同晒，相信大家都會放鬆心情比賽，預計會出現唔少入球，大盤值得留意。
